У Беларусі збіраюцца рабіць ялавічыну без кароў, а бензін - з раслін

• 20.01.2010, 16:05

У Беларусі з'явілася першая біятэхналагічная вытворчасць.

Афіцыйны тэлеканал СТВ паведамляе, што ў Інстытуце мікрабіялогіі сёння адкрылі цэнтр, які адпавядае самым сучасным у гэтай галіне стандартам. Адзначаецца, што з адкрыццём уласных біятэхналагічных вытворчасцяў Беларусь атрымлівае магчымасць развіваць гэту галіну на айчынным матэрыяле. Напрыклад, асноўную масу лекаў дагэтуль у нас вырабляюць на прадуктах замежных біятэхналогій. Пры гэтым гаворка ідзе не толькі пра імпартазамяшчэнне, але і пра патэнцыйную магчымасць прадаваць нашыя распрацоўкі, адзначае тэлеканал.

У інтэрв'ю СТВ старшыня Прэзідыума НАН Беларусі Міхаіл Мясніковіч заявіў:

- Мы разлічваем - 30 рублёў на рубель выдаткаў. Вось якая эфектыўнасць! Ніводная суперсучасная галіна прамысловасці ці народнай гаспадаркі не можа даць такі эканамічны эфект.

У бліжэйшыя 5 гадоў у Беларусі плануюць адкрыць яшчэ некалькі біятэхналагічных вытворчасцяў, перадае СТВ і заяўляе: перспектывы развіцця гэтай галіны вельмі высокія. Ужо даказана, напрыклад, што мікробы ўмеюць ператвараць расліны ў бензін.

Навукоўцы ў Еўропе сур'ёзна б'юцца над тым, як навучыцца не пасвіць мільён кароў, а вырабіць неадрозную ад звычайнай ялавічыну пры дапамозе новых тэхналогій. Кажуць, што гэта справа будучыні, праўда, ужо не занадта аддаленай, падсумоўвае дзяржтэлеканал.