У Менску дворнік праявіў працоўны энтузіязм, але жыхары дому гэта не ацанілі

• 27.06.2024, 11:08

Што пайшло не так?

У Менску супрацоўнік ЖКГ у адным з двароў на вуліцы Гедройца пачаў грымець кантэйнерамі для смецця ў чатыры гадзіны раніцы. Жыхары дому паскардзіліся на яго ў адміністрацыю раёну. Там заявілі, што працоўны дзень у яго пачынаецца з сямі раніцы і ён проста «праявіў ініцыятыву», піша «Менск-Навіны».

На днях у адміністрацыю Маскоўскага раёну звярнулася мянчанка, якая жыве ў доме на вуліцы Гедройца. Яна паскардзілася на працу дворніка, які ўжо з чатырох гадзін раніцы грыміць смеццевымі кантэйнерамі.

- Світае рана, і такім чынам работнік праявіў ініцыятыву, на ўласнае жаданне выйшаў працаваць крыху раней, каб выканаць свой аб'ём работ. Але не ўсведамляючы, што пэўны шум, які даносіцца да жыхароў, стварае сурʼёзныя нязручнасці, – сказала кіраўніца адміністрацыі Маскоўскага раёну Таццяна Калядка.

Як яна растлумачыла, у адпаведнасці з кантрактам у дворніка рэжым працы ўстаноўлены з 7.00.

Калядка адзначыла, што ў адміністрацыі раёну яшчэ раз дадаткова акцэнтавалі ўвагу таварыства ўласнікаў, дзе працуе супрацоўнік, на неабходнасць захавання графікаў працы.