У Беларусі забаранілі продаж парашка магілёўскага вытворцы
- 27.06.2024, 17:30
Небяспечна прымяняць у некаторых пральных машынах.
З 27 чэрвеня ў Беларусі забаранілі прадаваць мыйны сінтэтычны парашкападобны сродак Washing Tone «Горная свежасць Аўтамат», які вырабляе магілёўская кампанія ТАА «Сэльвін-Про», паведамляе Дзяржстандарт.
Паводле вынікаў праверкі ўстаноўлена, што вытворца мыйнага сродку ў маркіроўцы наўмысна ўказаў прызначэнне прадукцыі «для выкарыстання ў пральных машынах любога тыпу», але пры гэтым ён не можа прымяняцца як сродак для мыцця з нарміруемым пенаўтварэннем для пральных машын з франтальнай загрузкай: паказчык «пенаўтваральная здольнасць» пры норме не больш за 180 мм склала (199 ± 5) мм.
«Перавышэнне паказчыка «пенаўтваральная здольнасць «уводзіць у зман спажыўца прадукцыі адносна яе прызначэння, якасці і бяспекі і не выключае рызыку бяспечнага выкарыстання мыйнага сродку ў пральных машынах з франтальнай загрузкай. Акрамя таго, прадукцыя не адпавядала ўстаноўленым у Рэспубліцы Беларусь абавязковым патрабаванням ДАСТ па паказчыку «мыючая здольнасць»: пры норме не менш за 85% для парашкападобных мыйных сродкаў паказчык склаў 47,3%», – гаворыцца ў паведамленні ведамства.
Парашок забаранілі прадаваць у Беларусі, а тавар, які ўжо паступіў у продаж, павінны выключыць з абарачэння.