Беларусы сталі радзей несці грошы ў банкі

• 28.06.2024, 18:22

Нацбанк напалохаў насельніцтва перасцярогай дэвальвацыі.

У Беларусі запавольваецца тэмп прыросту рублёвых укладаў. Замежную валюту ў банкі людзі таксама нясуць усё радзей. Гэта вынікае са статыстычнага бюлетэня Нацбанка.

З пачатку года агульны памер рублёвых укладаў у беларускіх банках павялічыўся на 12,2% – да 8,99 млрд рублёў на 1 чэрвеня. Але ў апошнія месяцы відаць запаволенне прыросту: калі ў красавіку агульны памер сродкаў на ўкладах вырас на 2,2%, то ў траўні – на 1,8%.

У той самы час прадаўжаюць скарачацца валютныя ўклады. Калі на 1 студзеня іх было ў эквіваленце 9,44 млрд рублёў, то на 1 чэрвеня – ужо 8,86 млрд рублёў.

Нагадаем, раней эканамісты ўказвалі на нетыповыя паводзіны беларусаў для людзей, якія, мяркуючы з статыстыкі, становяцца багацейшымі. Раней у перыяды росту прыбыткаў нашы суграмадзяне імкнуліся назапашваць валюту і не моцна набіралі крэдыты (калі толькі гэта не абяцала выгодаў ад дэвальвацыі нацыянальнай валюты). Цяпер жа людзі актыўна трацяць заробкі, якія растуць.