Падлеткі двойчы абрабавалі гандлёвы пункт з марозівам у Берасцейскай крэпасці

• 30.06.2024, 17:41

Вынеслі пяць кілаграмаў прысмакаў і не толькі.

У Берасці затрыманыя два падлеткі за крадзеж пяці кілаграмаў марозіва, паведамляе Дэпартамент аховы МУС.

Інцыдэнт адбыўся ў гандлёвым пункце на тэрыторыі Берасцейскай крэпасці, дзе было выкрадзена пяць кантэйнераў марозіва і вафельныя ражкі. Ахова заўважыла падлеткаў са здабычай блізу 5-й раніцы, пасля чаго яны кінулі скрадзенае і ўцяклі.

Аднак неўзабаве іх знайшлі ў закінутых казематах крэпасці. Зламыснікамі аказаліся мясцовыя жыхары 14 і 17 гадоў, якія раней ужо ўчынілі крадзеж з касы таго ж гандлёвага пункта. Страты склалі прыкладна 1000 беларускіх рублёў.