ГУР: У рамках абмену палоннымі пяцярых украінцаў вярнулі з тэрыторыі Беларусі
- 1.07.2024, 21:53
Гэта былі два мужчыны і тры жанчыны.
У рамках апошняга абмену палоннымі паміж Украінай і Расеяй пяцярых украінцаў вярнулі з тэрыторыі Беларусі 29 чэрвеня. Пра гэта расказаў прадстаўнік Галоўнай управы выведкі Мінабароны Украіны Андрэй Юсаў у каментары РБК-Украіна.
Ён удакладніў, што гэта былі два мужчыны і тры жанчыны. Паводле ягоных словаў, гэта грамадзяне Украіны, якія, як мяркуюць у ГУР, былі затрыманыя і ўтрымліваліся незаконна.
Усяго ў рамках 53-га абмену вярнулі 90 украінскіх вайскоўцаў і 10 цывільных жыхароў Украіны, нагадаў Юсаў.
Прадстаўнік ГУР дадаў, што паміж Украінай і Беларуссю на сёння, «безумоўна, няпростыя ўзаемаадносіны».
«Але ў той самы час на гэты момант дакладна адрозная сітуацыя ад таго, што мы маем з так званай Расейскай Федэрацыяй. Двухбаковая праца дапамагла развязаць гэтае пытанне», – сказаў Юсаў.